Usamah El Madny seulaku keupala dinaih pendidikan dayah Aceh jinoe geuharap that bak pengurus seureuta anggota Rabithah Thaliban Aceh (RTA) supaya beu kreatif lam meudakwah. Pu lom lam pandangan pak Kadis nyang bahwa mantong kureung that dakwah ureueng dayah lam media.
Pak Kadis geuharap, beu seumaken gigeh le ureueng dayah untuk meudakwah lam media.Meunyo na pengajian Abu-Abu geutanyoe, ta share rata sagoe, supaya beujiteupu le ureueng laen. Bek sampe talo teuh ngon awak laen. Awak laen nyan padahai dua krek sagai ureueng, tapi nah, meutaga ji share. Meuhie ramee ju. Guyak meunan." Meunan lah kira-kira haba Pak Kadih beuklam (7/3/2020) bak acara rakor RTA di hotel Grand Nanggroe, Lueng Bata, Banda Aceh.
Le Pak Usamah seunang that bak geukalon na RTA Pidie nyang gigeh that bak peugot pengajian, terutama that keu aneuk muda. Meunan sit le RTA nyang na di Banda Aceh nyoe, nyang geupimpin le Teungku Ismail Husen nyang na travel nanggroe, seubab adak sibok bak travel, nyang pengajjian geupeuudep di Banda Aceh nyoe deungonan nan MMR (Majeulis Mahabbah Rasulullah).
Oma, nyoe ka roh meuiklan keu Travel Nanggroe kiraju. Alah h'ana pu, soe teupu geutme lhat iklan bak Nasaja Berita, ka raseuki Apa, na pu ta bayeu kupi ngon ruti seule. Hoe neuh Teungku Ih, bek tuwo neubaca, neuhubungi Apa bak peseubok beh. Khak.Seulaen nibak nyan, Pak Kadis geuharap that sit lom, supaya ureueng lam RTA nyoe, beujeut peugot rilis berita. "Beu jeut ta tuleh rilih berita, mangat rame ureueng dayah lam koran dan media onlen. Jadi jeut ta kampanye ulama, program seureuta prestasi dayah." Sambong pak Kadis.
Tapi meunyo rilis lam basa Aceh bak Nasaja h'ana tom na soe kirem pih. Meunyo na teugku Tarmizi Thaib Meukuta Alam Raya sagai. Nyan pih lawet nyoe ka laloe jak peugleh kuburan indatu dum. Kakeuh h'ana le ju. Aleh wap h'ana gaji pih h'an geutem le, aleh keubiet sibok geuh. That na teuh, lagee haba itu.
Nyan ban laporan intelijen bak acara Rakor Rabithah Thaliban Aceh (RTA) beuklam.Meunyo silap-silap siangen dan na leubeh bak Apa rawi lam meususon kata, neu maklum keudroe ju. Gaya Apa peu ek berita sit ka lagee nyoe, rap peureuseh ureueng meupep-pep bak keudee kupi. (Sumber:https://www.nasajaberita)